Олонхо нэдиэлэтэ

Сэтинньи 28 күнүгэр Олонхо декадатыгар аналлаах нэдиэлэ түмүктуур күнэ олус тэрээһиннээхтик буолан ааста.  “Олонхо дойдутун оҕотобун” нэдиэлэ сэтинньи 24-28 күннэригэр буолан ааста. Нэдиэлэ устата, оҕолор сахалыы таҥнан сырыттылар, переменалар кэмнэригэр оскуола библиотекатыгар “Олонхо остуоруйата” тыыннаах выставка, манна оҕолор олоҥхо туһунан кинигэлэри билистилэр, Олонхоленд остуол оонньуутун оонньоотулар. “Олоҥхо оҕо хараҕынан” диэн уруьуй конкурсугар 116 оҕо кытынна, кылаастарынан биирдии кыайыылаах, иккилии иккис миэстэлээхтэр, үстүү үһүс миэстэлээхтэр таҕыстылар.  Физкультура уруоктарыгар оҕолор саха национальнай оонньууларын билистилэр, күрэхтэстилэр. “Төрөөбүт дойду , киһи, ийэ тыл-олох ситимэ” диэн нэдиэлэ устата бары кылаастарга кылаас чаастара ыытылыннылар, “Инфознайка” куруһуок салайааччыта Васильев А.Р. бэйэтэ онорбут “Дьурулуйар Ньургун Боотур” мультигын бары оголор сэргээн көрдүлэр. Саамай кэтэһиилээх түгэн сэтинньи 28 күнүгэр оскуолабыт остолубуойун үлэһиттэрэ, повардар Эверстова П.С., Протопопова З.А. бука барыбытыгар бэлэх оҥорон “Саха лэппиэскэтин күнүн” минньигэстик астаан ыыттылар, арыыга буспут барыанньалаах лэппиэскэ, үүттээх чэй сарсыарда аһылыкка оҕолор астына-дуоһуйа, тото-хана сиэтилэр, бэйэбит аспыт лэппиэскэ минньигэһин сөхтүлэр, онтон күнускү аһылыкка аны сэлиэйдээх миин бырылаччы истилэр. Икки чаастан биир дойдулаахпыт олоҥхоһут П. Ядрихинскай - Бэдьээлэ “Дьырыбына Дьырылыатта” олоҥхотун туруоран көрдөрдүбүт. Олоҥхого сүрүн оруолларга оонньоотулар 4-с кылаас үөрэнээччилэрэ Рая Хордогосова, Кирилл Павлов, Вася Иванов, Паша Осипова, Айгыына Максимова, Слава Данилов, Клара Попова уонна олонхону кэпсээтэ Вася Дьяконов Бөтүн орто оскуолатын үөрэнээччитэ. Маассабай оруолларга 4- кылаас уорэнээччилэрэ бука бары кытыннылар, ол курдук саха норуота - 4в, 4б (кыл. Сал. Владимирова К.Е., Михайлова М.Н.) кылаастар, абааьылар- саха кыргыттара 4 а кылаас кыргыттара (кыл. Сал. Тимолфеева Н.И.), суордар, уоттар - 4 г кылаастар( кыл. Сал. Андреева А.С.) көхтөөхтук кытыннылар, ону тэнэ 2-с, 3-с кылаастар (кыл. Сал. Парнякова С.Н., Ноговицына М.П., Неустроева В.И.) үҥкүү куруһуогүн (сал. Герасимова Л.В.) оҕолоро Эрэкэ-дьэрэк, Алаас оҕолоро үҥкүүлэри толордулар, оҕолор көстүүмнэрэ төрөппүттэр көмөлөрүнэн тигилиннэ. Бу улахан үлэни, олоҥхо турууоруутугар Түөлбэ оҕо киинин кытта бииргэ үлэлээһин чэрчитинэн, фольклор уһуйаанын салайааччылара Иванова Л.К., Сыромятников В.В. үлэлэстилэр,  кинилэргэ махталбытын тириэрдэбит. Нэдиэлэ оһуохайынан түмүктэннэ. Олоҥхо дойдутун оҕотобун нэдиэлэ оҕолорго олоҥхо өйдөбулүн хаалларда, бука бары астынныбыт.